Guyonan Dermayu - Nongton Sandiwara (2)

 

WIS puyeng lan mengkel, gara-gara dibebodo bae ning rabine, ceritane Onyon purik, bli kiyeng balik meng umah. Saban dina mung meneng lan turu bae ning jondol. Nyi Tarkunah uga pada bae mengkonon, lantaran wis mengkel ning lakine, Onyon bli lok dikirimi sega. Bagen jare mah Onyon kongkon luruh mangan dewek. “Arep kampong arep beli masa bodo, delengaken bae.”

Masih bli dikirimi sega, Onyon bli apa-apa. Nyongan akeh bature pengen mangan mah kari jaluk bae bli wurung ana sing ngupaih. Kaberan wulan kien akeh wong hajatan, asal gelem rerewang lan melu melekan, bli wurung sing duwe hajat ngupaih mangan, rokok, lan duit keding.

Dina Rebo bature Onyon hajatan, ngerasulaken anak wadon sing lagi belajar ning SD. Onyon sampe solot ngrewangi bature sing lagi duwe gawe. Telung dina telung bengi sibuk rerewang apa bae sing penting apa sing dikongkon bature Onyon bli itungan. Mang Kodir sing duwe gawe seneng pisan direwangi Onyon sing trengginas.

Hajatan nagape singa depok, ngarak anak sing dirasulaken. Esuke nanggape sandiwara. Waya si penganten rasul lagi diarak muter-muter jalan desa, Onyon sibuk pisan. Mana mene ngatur kendaraan amber lalu-lintas lancar. Lagi ngarak akeh bocah enom sing joged lan nyawer duit meng biduan sing nembang lagu dangdut Jawa Dermayonan. Onyon melu meluan joged lan pesen lagu keding.

“Mang kita jaluk sawere. Bli isin tah sing mau joged bli nyewer-nyawer,” jare biduan ngomong ning Onyon.

“Sorry bae. Mamang bli duwe duwit. Mengko bae bayare nganggo beras, kitae jaluk dikit ning majikan,” jawab Onyon.

Si biduan ngrasa kesigung, deweke purik ngumbangi Onyon sekarat kadal. “Dasar tukang joged medit! Ngehina!” si biduan nyewot ngomonge santer pisan nganggo mik spiker kerungu wong kabeh. Wong sing lagi nongton arak-arakan pada gemuyuh. Kaberan Nyi Tarkunah lagi nongton, deweke ngerasa isin lakine disebut wong sombong, wong medit ning biduan.

“Hey biduan! Sira aja lok sombong, ya! Kita isin! Isin ning uwong! Sing diumbangi sira iku lakine kita. Pengen jaluk sawer mah aja diomongi ning sepiker ngomong bae ning kita! Dasar biduan kurang ajar!” Nyi Tarkunah nyewoti biduan bari marek meng glodogan dorong tempat si biduan dodok bari nembang.

“Punten bae Bi. Nyongan laki sampeyan mah bli duwe rai. Pesen lagu wis ping telu bli ngupaih duwit bae. Ya kita kepaksa jaluk!” jare si biduan melu isin, lantaran akeh uwong pada deleng Nyi Tarkunah tukaran karo biduan. Ari Onyon mah deleng rabine tukaran tenang-tenang bae joged.

“Maaaa! Kuh deleng Mimi lagi tukaran karo biduan!” si Cenang ngomong ning bapane sing lagi joged.

“Wis aja diladeni, Nang! Mama kagok kih lagi enak-enak joged! Gage mana balik sira aja melu tukaran!” jare Onyon ning anake si Cenang.

 

Onyon manyun

Seuwise dipisah ning Hansip, sing lagi tukaran toli marian. Nyi Tarkunah masih kurang puas. Dewewke terus marek ning lakine sing lagi joged. Plak! Plak! Plak! Plak! Endas Onyon dipentung nganggo sandal japit.

“Aduuuh! Ampun, Mi! Ampuuuun!” Onyon mari jogede, terus gage ngeloyong ning pinggir jalan bari ngerasakaken endase sing benjut lara kena pentungan.

Arak-arakan marian. Penongton bubaran. Seuwise mangan lan diupaih duwit ning tuan hajat, grup singa depok mulang nunggang truk. Onyon sing lagi dodok bari ngelus-ngelus endase ning parek tukang baso, marekai ning tukang hajat. Mang Kodir sing diwe hajat ngerti, maksude Onyon pengen jaluk bayaran

“Kesuwun Nyon, sira wis ngebantu kita. Tolih hiburan dadi rame gara-gara sira lan rabi nira melu pentas ning arak-arakan. Penongton angkat jempol bari pada ngomong jare mah arak-arakan sukses gara-gara Onyon,” jare Mang Kodir gemuyuh.

“Iya rame Boss. Tapi endas reyang benjut. Kuh deleng. Gara-gara dipentung mboke bocah!” jawab Onyon bari nerangaken yen Nyi Tarkunah marek ning biduan gara-gara kesinggung Onyon disebut wong medit lan kumed.

Mang Kodir gemuyuh ngakak. Ari bokat Onyon gawe acara melu ngehibur penongton nganggo sandiwara-sandiwaraan karo Nyi Tarkunah. “Bli weruh endas sira benjut. Ha ha ha ha,” Mang Kodir karo rabine ngakak. Penganten rasul uga pada bae melu gemuyuh.

Ny. Rukoyah rabine Mang Kodir maturaken kesuwun meng Onyon. Wis rong dina rong bengi bebantu ning keluarga tuan hajat. Mau Ny. Rukoyah wis ngupaih duwit, beras, rokok lan jabur wis langsung dikirim meng umae Onyon.

“Kesuwun ya Nyon. Kita bli bisa ngupaih apa-apa. Ya kita ngupaih mung semono, lumanyan etung-etung kanggo bantu bantu keluarga nira!” jare Ny. Rukoyah.

“Ari kanggo kitae, endi Bi!” omong Onyon.

“Lah! Kepriben ari sampeyan lok aneh-aneh. Nyongan kabeh wis dikirim meng umah. Baka pengen duwit lan rokok mana bae jaluk meng rabi nira!” jare Ny. Rukoyah.

Bli permisi maning ning tuan hajat, Onyon langsung ngeloyong bari manyun, muru tempat istirahate ning “hotel gratis”, jondol. (Mang Uyo)