Wa Kabul : Wis awan mengkenen sira masih turu bae. Kuh delengen batur lagi pada sibuk luruh duit kabeh. Ana sing meng sawah, ngojeg, dagang es, nyitak bata, lan luruh duwit sejenne, mekaya apa bae sing penting judule luruh rejeki.
Onyon : Enak turu Wa, Bli pegel. Kanggo apa luruh pegawean. Arep metu sing umah gah isin ning batur sedulur wa.
Wa Kabul : Kenapa isin sirane maning? Duwe dosa, ya ? Mulane jare Uwa gah gage dirobah kelakuan sira kuh, aja lokan gawe dosa ning uwong lian. Doraka !
Onyon : Dudu mengkonon, Wa! Kita isin lantaran sewulan sewise lebaran akeh pisan wong hajatan. Kita sama sekali bli lok kondangan, lantaran rumasa bli duwe duwit. Sing isinne maning ampir saban dina akeh uwong nagih beras, lantaran melu telitian bli bisa bayar. Mangkane kita meneng soten ning umah, ya mengkonon iku alasane Wa!
Wa Kabul : Jare winginane rabi nira sing Arab ngirim duwit jutaan? Toli dienggo apa duwit? Lah ... ana ana bae sira mah lok gawe isin tangga.
Onyon : Entok Wa. Dienggo bayar uang bangunan sekolah si Cenang. Bayar ulangan umum, tuku klambi seragam, bayar utang ning warung lan sejenne. Tulung ya Wa, baka ana wong nakon kita aja dipai weruh ya!
Wa Kabul : Eling Nyon. Sira wis rumasa olih telitian. Taun wingi si Cenang sunatan. Malah sira jare olih bati gede sing telitian. Nah kepriben sekiyen sira bli bisa bayar sing taun wingi mah telitian ning sira?
Onyon : Jare sapa olih bati? Rugi Wa! Rugi! Bli weruh Uwa mah. Basa kotak sumbangan dibuka, nyatane akeh amplop kosong. Kurang ajar iku uwong, ngece ning kita. Wis isi kotak olih setitik, kanggo bayar sandiwara kepaksa ngedol beras dikit. Kanggo bayar depok uga kurang satus ewu maning. Sumpah Wa! Sewise hajatan akeh sing nagih utang. Puyeng Wa! Puyeng!
Wa Kabul : Anak bogor sira mah. Bagen tekor asal kesohor. Nyunati si Cenang nanggap hiburan sing larang. Sing diarane nanggap sandiwara sing jelas wis larang, kanggo mangan lan ngupaih rokone pemain mangpirang-pirang, entok jutaan. Bayar depok bli adoh pira. Tambah maning bayar izin rame-rame, bayar sing jaga keamanan mengpirang-pirang duwit entoke. Baka rumasa sira wong bli duwe, ya tulung waktu si Cenang cukup disunat ning dukun, cukup mayoran nyembelih entog digawe pedesan. Tolih dipangan rame-rame karo tangga, beres. Sedurunge mayoran ngaji Qur’an bareng bagen Uwa sing mingpin.
Onyon: Keder Wa! Si Cenang bli gelem disunat baka bli diarak nganggo singa depok lan dihibur nganggo sandiwara. Baka bli dituruti kepriben, dituruti rugi akibate, Wa!
Wa Kabul: Aja lok nyalakaken uwong jare akeh sing ngupaih amplop kosong. Coba mikir eling baka sira kondangan apa bener lok nganjingi amplop kosong. Nah iku sing arane hukum karma!
Onyon: Bener Wa! Tapi kenapa wong sing hajatan weruh kita ngupai amplop kosong, padahal ning amplope bli di tulis arane kita.
Wa Kabul: Jare apa bli weruh! Wong hajatan curiga lantaran kabeh sing kondangan ngupaih duwit ning jero amplop. Ari sira ngupaih amplop kosong. Sing dadi mengkel sing duwe hajat, lantaran baka sira kondangan, kesempatan anak karo mertua kabeh digawa kondangan. Mung ngadon mangan bae, nyumbang duwit mah beli lokat. Gawe bobad bae.
Onyon: Tolih kepriben carane Wa, amber kita bli puyeng diudag-udag wong sing wis nembe hajatan?
Wa Kabul : Gage bayar telitian. Lantaran sira rumasa wis olih telitian taun winginane. Saban anggota telitian bayar beras dua kwintalan. Ya sira kudu bayar semono. Mulane gah aja lok sombong melu arisan Nyon, baki rumasa sira wong bli duwe mah.
Onyon: Bulan kiyen kita kudu bayar beras seton meng wong lima. Jare baka bli dibayar lunas sedurunge Rayagung, kita bakale garep disidang ning bale desa. Duh kepriben ya Wa. Keder, mimie bocah masih suwe ngirim duwite mengko Januari jare mah.
Wa Kabul: Keder! Uwa mah masing duwe duit uga, gelem busung bli garep ngutangena ning sira. Wis kapok! Saban sira ngutang angel bayare.
Onyon: Ya wis baka Uwa mengkonon mah! Baka bli gelem bantu, kita mah arep turu maning. Gage balik Wa kita wis ngantuk. Wa Kabul meduuut! Eh mediiit !
Wa Kabul : Kurang ajar sira Nyon. Dasar dableg uripe
(mang uyo)
Komentar